ONGI ETORRI!

Finlandiarrok eta euskaldunok berezko hurbiltasuna eta begikotasuna sentitzen dugu elkarrekiko. Bi kultura eta hizkuntza hauen parekotasunetik eta bi herriotako biztanleon izaera zintzo eta nekaezinetik datorrela uste dugu.

Badakigu herri txikiak eta bereziak garela; izan ere, ondotxo dakigu nola babestu behar ditugun mintzaira eta kultura txiki eta ezezagunok handien itzalean. Oso bikote bitxia osatzen dugu. Eta hain zuzen ere, bi herrion arteko adiskidetasuna eta elkartasuna bultzatzeko sortu zen Euskal Herrian Suomitar izeneko kultur elkartea.

AZKEN BERRIAK: FINLANDIA 100 URTE!suomifinland100-tunnus2

Aurtengo abenduaren 6an 100 urte beteko dira Finlandiak independentzia aldarrikatu zuenetik (informazio gehiago: http://suomifinland100.fi/#). Horren harira, Suomitar elkartean mendeurrena ospatu nahi izan dugu eta horretarako abenduan eta urtarrilean zehar erakusketa bat antolatu dugu Loiolako kulturetxean (Donostian)

“FINLANDIA BURUJABEA, 100 URTE – FINLANDIA 100 AÑOS DE INDEPENDENCIA – SUOMI-FINLAND 100 VUOTTA”

Abenduaren 1etik aurrera egongo da zabalik, astelehenetik ostiralera 16-20:30 (sarrera doan). Hasieratik Finlandiari buruzko informazio panelak eta bestelako osagaiak egongo dira. Abenduaren 12tik aurrera, berriz, Xabier Beloki eta Pilar Palaciosen argazkiak izango ditugu ikusgai: ”Bidaia bat, bi ikuspegi”. Inaugurazio ekitaldia abenduaren 15ean izango da (ostirala), kantu eta pintxo finlandiarrez lagunduta. Ongi etorri bertara!